1,2% arbeiðsleys í februar – arbeiðsloysi framvegis fallandi

Arbeiðsloysi var 1,2% í februar í ár samanborið við 2,1% í sama mánað í fjør. Gongdin er lýst við trendinum, sum vísir, at arbeiðsloysið hevur verið støðugt fallandi síðani 2012. Tá lá arbeiðsloysið um 6-7%.

(trýst á myndirnar, so tær gerast størri og tú kanst blaða millum hesar)

Myndin niðanfyri vísir arbeiðsloysi fyri bæði kyn. Kámu strikurnar vísa arbeiðsloysisprosentið og sterku strikurnar vísa gongdina ella trendin fyri kynini.

Lítil munur sæst millum kynini. Í februar var var arbeiðsloysið 1,0% hjá monnunum og 1,5% hjá kvinnunum. Fyri sama mánað í fjør var arbeiðsloysi 2,0% hjá monnum og 2,8% hjá kvinnum. Arbeiðsloysi hevur verið støðugt fallandi bæði hjá monnum og kvinnum seinastu árini og munurin millum kynini er minkaður seinastu trý árini.

(trýst á myndirnar, so tær gerast størri og tú kanst blaða millum hesar)

Í øllum økjum uttan í Sandoy er arbeiðsloysið minkað í mun til sama mánað í fjør. Størsta minkingin er í Eysturoy, Norðoyggjum og Suðuroy. Munurin millum Suðuroy og hini økini er nú ikki so stórur, sum hann hevur verið.

(trýst á myndirnar, so tær gerast størri og tú kanst blaða millum hesar)

Í februar var minsta arbeiðsloysið hjá teimum í miðjum aldri 45-54 ár við 0,7% og tí yngsta aldursbólkinum við 0,9%. Hægst er tað hjá teim 25-34 ára gomlu við 1,9%. Í hesum aldursbólkin er munurin millum kynini serliga stórur, har tað er tvífalt so stórt hjá kvinnum sum hjá monnum.

(trýst á myndirnar, so tær gerast størri og tú kanst blaða millum hesar)

Myndin niðanfyri vísir hvussu leingi fólk hava verið í arbeiðsloysi. Í februar hevði stívliga helvtin av teim arbeiðsleysu verið arbeiðsleys styttri enn 3 mánaðir.

(trýst á myndirnar, so tær gerast størri og tú kanst blaða millum hesar)

Dagførdu arbeiðsloysistølini við fleiri útgreinaðum tølum finnur tú í hagtalsgrunninum býtt á øki, aldur, kyn og tíð í arbeiðsloysi her.

 

Stutt um arbeiðsloysi

Arbeiðsleys eru persónar millum 16-66 ár, sum eru skrásettir sum arbeiðsleysir hjá ALS og Almannaverkinum.

Arbeiðsleys eru eru uttan nakað arbeiði, eru fult tøk fyri arbeiðsmarknaðin og eru virkin arbeiðssøkjandi.

Tvey mát verða brúkt at gera arbeiðsloysið upp: fulltíðararbeiðsloysi og rakt av arbeiðsloysi:

Rakt av arbeiðsloysi: Tal á persónum, sum hava verið arbeiðsleysir 1 dag ella meira í mánaðinum.

Fulltíðararbeiðsloysi: Av tí at øll ikki eru arbeiðsleys allar dagar í einum mánað, verða øll, sum eru rakt av arbeiðsloysi, umroknað til fulltíðararbeiðsleys.

Arbeiðsloysisprosent: Fulltíðararbeiðsloysið í mun til støddina á arbeiðsfjøldini.

Stutt um trendin

Trendurin lýsir rákið í arbeiðsloysinum við at reinsa fyri árstíðarfrávik og aðrar tilvildarligar broytingar í arbeiðsloysinum.

Hví eru arbeiðsloysistølini góðar tveir mánaðir afturút?

Orsøkin til, at arbeiðisloysistølini eru umleið tveir mánaðir afturút, er at fleiri seinkaðar skrásetingar um tey arbeiðsleysu verða gjørdar eftir at uppgjørdi mánaðurin er liðugur. Fyri fáa tær flestu rættingarnar við verður bíðað góðar tveir mánaðir, so at uppgerðin verður so rættvísandi sum møguligt.