Fólkatalið 1. apríl var 50.045

Fólkatalið var 50.045 tann 1. apríl. Tað vaks við 762 fólkum í 12-mánaðarskeiðinum apríl 2016 – mars 2017. Hetta kemur av nettotilflyting á 462, ið er tann størsta í 16 ár og burðaravlopi á 300, ið er tað størsta síðani 2007. Undantikið árini 2000 og 2001 hevur árligi fólkavøksturin ongantíð verið størri í tali enn nú.

Sáttligari vøkstur í lønargjaldingunum

Í apríl vóru lønargjaldingarnar, árstíðarjavnað, 726 milliónir. Hetta er annar mánaðurin á rað, at lønirnar minka, men minkingin er í mun til, at í februar vóru lønirnar tær hægstu nakrantíð. Samanborið við í fjør eru lønirnar sum heild hægri í ár.

Táttar í 26.000 løntakarar

Í februar vóru 25.940 løntakarar, árstíðarjavnað. Seinastu níggju mánaðirnar hevur tað verið vøkstur hvønn mánað, men framvegis restar eitt lítið sindur í, áðrenn tað verða fleiri enn 26.000 løntakar. Eitt stutt tíðarskeið á várið 2008 vóru tað beint yvir 26.000 løntakarar, tað mesta nakrantíð.

Smáar nøgdir í avreiðingum fyrsta ársfjórðing síðstu árini

Avreiðingarnar tilsamans fyrsta ársfjórðing í ár vóru í nøgd nakað lakari enn sama tíðarskeið í fjør, og eru nøgdirmar yvirhøvur smáar seinastu nógvu árini, samanborið við góð fiskiár. Av toski minkaði nøgdin smá 1.400 tons ella ein góðan fjórðing í mun til í fjør.

Stórur vøkstur í innflutningi og útflutningi

Innflutningurin fyrstu tveir mánaðirnar í ár var 1,2 mia. kr. Tað eru 20% meir enn somu mánaðir í fjør. Uttan skip og flogfør var vøksturin 10%. Sama tíðarskeið var útflutningurin 1,5 mia. kr. Tað eru 15% ella 200 mió. kr. meir enn í fjør.

Síður