Í februar vóru 784 millónir kr. útgoldnar í løn. Tað er ein øking upp á útivið 130 mió. kr. í mun til januar, sum vanliga er tann mánaðurin í árinum, tá minst verður útgoldið í løn.
Í desember í fjør vóru 26.476 løntakararar. Tað er ein vøkstur á 62 í mun til mánaðin fyri. Løntakaratalið er vaksið síðani 2013 og hevur seinastu mánaðirnar sett nýggj met. Tað vísir trendurin, ið leggur upp fyri avvikum í árstíðunum og øðrum óreglusemi í løntakaratølunum, so tey kunnu samanberast mánað fyri mánað.
Í januar var árstíðarjavnaða fulltíðararbeiðsloysið 2,1%, samanborið við 2,4% fyri einum ári síðani. Í tali var fulltíðararbeiðsloysið 589 persónar í januar í ár, tað eru 144 færri enn sama mánað í fjør. Minsta arbeiðsloysið er í Vága sýslu við 1,3%, og tað mesta er í Suðuroy við 4,2%.
Samhandil Føroya við útheimin var 15,8 mia. kr í fjør. Tað var 1,2 mia. kr. størri enn árið fyri. Hetta kom av vøruinnflutningi á 7,2 mia. kr. og vøruútflutningi á 8,6 mia. kr. Sostatt var yvirskotið á handilsjavnanum 1,4 mia. í fjør. Nógv størstu útflutningurin fór til Russlands, og nógv mesti innflutningurin kom úr Danmark.
Búskaparráðið almannakunnger í morgun sína hálvárligu búskaparfrágreiðing, har m.a. verður mett um gongd og útlit í føroyska búskapinum. Síðan seinastu frágreiðing á heysti í fjør eru ávísar fortreytir fyri búskapargongdina í 2018 broyttar og minni jaligar. Framrokningin fyri 2018 er sostatt minni bjartskygd og BTÚ í leypandi prísum fyri 2018 verður mett at verða hálvt prosent størri enn BTÚ í 2017.
