Metstórt hall á handilsjavnanum
Nú bæði inn- og útflutningurin fyri fyrra hálvár eru gjørd upp, ber til at gera handilsjavnan fyri sama tíðarskeið. Henda uppgerð vísir, at í ár høvdu vit størsta hall á handilsjavnanum nakrantíð fyri eitt hálvár. Vit hava innflutt fyri útvið 1,4 mia. kr. meir, enn vit útfluttu fyri. Um vit samanbera við alt árið 2007, sum er árið við størsta handilsjavnahalli higartil, var hallið tá 1,465 mia. kr.
Fremsta orsøkin til at hallið á handilsjavnanum er so stórt í ár, er, at tað eru innflutt fleiri dýr og stór skip, umframt at eitt nýtt flogfar er komið til landið.
Um vit gera handilsjavnan upp uttan skip og flogfør, so var hallið 116 mió. kr.
Í fjør vóru onkur skip keypt til landið í samband við makrelfiskiskapin. Hesi vóru seld av landinum aftur seinni sama ár. Um hetta eisini ger seg galdandi í ár, vil tað í sær sjálvum føra til, at handilsjavnahallið fyri alt árið verður minni enn tølini nú benda á.
At hallið á handilsjavnanum er stórt, tí íløgur verða gjørdar í stór vinnutól, eigur ikki at órógva, tí íløgurnar verða virðisskapandi sum frá líður.
Handilsjavnin, ið fevnir um vøruhandilin við útlond, er bara ein partur av samanløgdu viðskiftum okkara við umheimin, men nógv tann størsti einstaki parturin. Samanløgdu viðskifti okkara við umheimin síggjast í gjaldsjavnanum, sum umframt handilsjavnan eisini umfatar tænastuhandilin við onnur lond, lønarinntøkur og lønarútreiðslur millum Føroyar og umheimin, rentugjaldingar og beinleiðis pengaflytingar, har danska ríkisveitingin er størsti parturin.
