Rakstur

07. okt 2026
Úrslitið í botnfiskiveiðu útvið 200 milliónir krónur í 2025

Roknskaparhagtøl býtt á vinnugreinar eru dagførd fyri árini 2022 til og við 2024 og 2025 er uppgjørt fyri fyrstu ferð. Harumframt eru temasíðurnar dagførdar fyri allar vinnubólkarnar. Temasíðurnar eru at síggja undir breddanum 'Vinna'. 

Nýggju hagtølini vísa, at fyri allar vinnur samlað hevur gongdin verið minni góð í 2025 í mun til 2024. Í 2023 høvdu vinnurnar úrslit á 3,8 milliardir krónur, men í 2024 minkaði úrslitið samlað fyri allar vinnur niður á 3,4 milliardir krónur og í 2025 niður á 3 milliardir krónur.

[px-graph-1]

Byggivinnan verri úrslit

Í bólkinum ‘Landbúnaður, fiskiveiða og aling’ var úrslitið 1,1 milliardir krónur, ið er ein minking triðja árið á rað og góð sjey prosent lægri enn úrslitið fyri hendan bólkin í 2024. Í ‘Byggivinnu’ lækkaði úrslitið fyri fyrstu ferð síðani 2021. Frá 2021 til 2024 hækkaði úrslitið í byggivinnuni frá 103 milliónum krónum í 2020 til 262 milliónir krónur í 2024. Í 2025 var úrslitið 230 milliónir krónur, ið er ein lækking á stívliga 12 prosent. Í bólkinum 'Søla, útleiga og umsiting av fastognum' var úrslitið 157 milliónir krónur, ið er ein hækking á smá 42 prosent í mun til 2024, tá úrslitið lá á 111 milliónum krónum. Úrslitið í 'Gisting og matstovuvinnu' er eisini hækkað frá 6,5 milliónum krónum í 2024 til 37 milliónir krónur í 2025.

[px-graph-2]

Úrslitið í botnfiskiveiðu hækkaði við 161 milliónum krónum

Í bólkinum ‘Landbúnaður, fiskiveiða og aling’ eru hægstu úrslitini í ávikavist ‘Aling’ og 'Uppsjóvarveiðu'. Innan ‘Aling’ var úrslitið 468 milliónir krónur í 2025, ið er 18 prosent lægri enn í 2024. Í 'Uppsjóvarveiðu' var úrslitið 394 milliónir krónur, ið er stívliga eitt prosent hægri enn í 2024, tá úrslitið var 389 milliónir krónur. Úrslitið vaks mest í 'Botnfiskiveiðu' , har tað er hækkað frá 31 milliónum krónum í 2024 til 192 milliónir krónur í 2025. Góða gongdin í 'Botnfiskiveiðu' sæst eisini aftur í útgoldnum lønum, har tølini vísa, at útgoldnu lønirnar í botnfiskiveiðu vóru 56 prosent størri í 2025 samanborið við 2024. 

[px-graph-3]

Úrslitið fyri fiskavirkir hækkaði í 2025

í 2025 var úrslitið í ‘Framleiðsluvinnu’ 700 milliónir krónur, ið er níggju prosent hægri enn úrslitið fyri 2024. 

[px-graph-9]

Her er tað serliga undir vinnugreinabólkinum 'Matvøruframleiðsla' í vinnugreinini 'Virking av fiski, skeljadjórum og molluskum', at úrslitið er høgt. Úrslitið lækkaði frá 2023 til 2024, men hækkaði nú aftur í 2025. Úrslitið hækkaði úr 535 milliónum krónum í 2024 til 581 milliónir krónur í 2025. 

[px-graph-10]

Úrslitið í byggivinnu lækkað 12 prosent

í 2025 var úrslitið í ‘Byggivinnu’ slakar 231 milliónir krónur, ið er 12 prosent lægri enn úrslitið fyri 2024. 

[px-graph-4]

Her er tað serliga í vinnugreinunum 'Húsasmíð, bæði bústaðar- og vinnubygningar', 'Vegagerð' og 'El-, rør- og annað innleggingarvirksemi' at úrslitið er lækkað við ávikavist 22 milliónum krónum, 14,4 milliónum krónum og 10,7 milliónum krónum samanborið við 2024.

[px-graph-5]

Søla, útleigan og umsiting av fastognum hækkað nógv

Í 2025 var úrslitið í 'Søla, útleigan og umsiting av fastognum' 157 milliónir krónur, ið er ein hækking á smá 42 prosent í mun til úrslitið í 2024.

[px-graph-6]

Úrslitið í gisting og matstovuvinnu hækkað annað árið á rað

Aftaná korona hevði 'Gisting og matstovuvinna' positiv úrslit í 2021 og 2022. Í 2023 var úrslitið tó aftur negativt við -5,5 milliónum krónum. Í 2024 var úrslitið tó aftur positivt við 6,5 milliónum krónum og í 2025 endaði úrslitið á gott og væl 37 milliónum krónum. 

[px-graph-7]

Undir korona og árini eftir vóru tað serliga 'Gistingarhúsini' sum togaðu úrslitið fyri 'Gisting og matstovuvinnu' niður, men í 2025 var úrslitið fyri 'Gistingarhús' smáar 30 milliónir krónir, ið er sløk tvey prosent hægri enn úrslitið á knappar 11 milliónir krónur í 2024. Úrslitið fyri 'Matveitingarvirksemi' hækkaði frá -4 milliónum krónum í 2024 til 7,6 milliónir krónur í 2025.

[px-graph-8]