Samanlagt minkaði innflutningurin við 414 mió. kr. í 2014 Tað er stóra minkingin í innflutninginum av skipum og flogførum, ið ger munin. Uttan skip og flogfør vaks innflutningurin við 187 mió. kr., svarandi til 3%.
Samlaði útflutningurin av fiskavørum í fjør var beint oman fyri 6 milliardir kr. Av hesum var útvið helvtin laksur. Vit útfluttu laks fyri hálva mia. meir í 2014 enn í 2013 - tað er ein vøkstur á 20%.
Bruttotjóðarúrtøkan í marknaðarprísum, BTÚ, var slakar 14.7 milliardir krónur í 2013. Tað er ein góð milliard og 7,5 prosent meira enn í 2012. Av hesum vøkstri átti fiskaaling helvtina, 510 miljónir. Meðan hin helvtin stavar frá vøkstri í flestu øðrum vinnugreinabólkum, serliga í sjóflutningi, handli og byggivinnu.
Í januar 2015 var árstíðarjavnaða arbeiðsloysið 896 fólk, svarandi til 3,3%. Tað eru nøkur fá fleiri enn í desember og november í fjør, men samanborið við januar í fjør eru tað eru 234 færri. Tá arbeiðsloysið ikki er árstíðarjavnað, er tað 962 fólk ella 3,5%. Hetta eru 55 fleiri enn í desember 2014 men 251 færri enn í januar 2014.
Í fjør útfluttu vit fyri 6,3 mia. kr. og innfluttu fyri 5,9 mia. Sostatt vóru 400 mió. kr. í avlopi á handilsjavnanum í fjør. Árið fyri var hall á 186 mió. Orsøkin til, at hallið í 2013 er vent til avlop í 2014 er, at útflutningurin er vaksin, meðan innflutningurin er minkaður.
